Seksa egaleco

Kara Renka,

Mi bedaŭras, ke mi ne skribis dum longa tempo, sed multaj aferoj okazis. La pasinta semajno estis terura. Mi estis en malsanulejo kun eta Emma. Mi baldaŭ eksplodos pro kolero. Mi devas skribi tion, ĉar vi estas en simila situacio, kiel mi.

Dimanĉe vespere, ŝia ventro komencis dolori. Vi scias, ke por dujara infano, tion povas kaŭzi multaj aferoj. Ni faris kradrostadon, do mi pensis, ke ŝi nur manĝis ion pezan, kaj ke estos pli bone matene. Kompreneble, mi kontrolis ŝian abdomenon, kaj ne estis la apendico. Ŝi ne havis febron. Matene estis pli bone, mi iris labori kiel kutime, kaj ŝi restis kun paĉjo (vi scias, ke li havas patran ferion, ĉu ne? Mi skribis al vi pri tio pasintfoje, ni ne havas elekton. Li ne havas laboron kaj ni devas vivi per io, do li restis hejme).

Posttagmeze estis terure. Li telefonis al mi por diri, ke ili iras al malsanulejo, ĉar eta Emma vomis plurfoje. Do li kondukis ŝin tien por kontrolo. Kvankam nenio estis trovita, ili decidis gardi ŝin por observado. Kamil volis resti kun ŝi, ĉar li sciis, ke gepatroj kun junaj infanoj rajtas resti en la malsanulejo. Estis terure, ke oni ne rajtigis lin. Onidire nur patrinoj povas resti kun infanoj, ĉar ili ne estas ekipitaj por patroj. Do li komencis demandi pri tio, kiajn specialajn ekipaĵojn ili bezonas, ĉar li nur volas esti kun sia infano. Do ili klarigis, ke ili ne havas apartajn ĉambrojn kaj li devus esti en ĉambro kun ies patrino, kaj ili certe ne ŝatus tion. Kamil argumentis, ke li pensas, ke ajna normala patrino zorgus pri sia infano kaj ne pri aliaj gepatroj. Malgraŭ siaj argumentoj, li ne rajtis resti. Li devis sidi antaŭ la ĉambro de doktoroj, kovrita je vomaĵo kelkajn horojn pli frue ĉar li ne volis lasi Emma, kiu tre timis. Finfine mi havis liberan tempon, kvankam mi estas en provperiodo, kaj mi povis iri mem. Bonŝance ne estis tiel malbone kun Emma, ŝi vomis ĉie en la malsanulejo kaj ili liberigis ŝin. Sed imagu, kio okazus, se mi estus en laborvojaĝo ie, aŭ se iu viro vivas sola kun infano. Estas aĉe. La ĉefa afero estas, ke ili nomas sin “beb-amika” malsanulejo. Do vi pensu pri tio, ĉu Peter devas esti en gepatra ferio kaj ne vi. Mi scias, ke li volas tion, kaj ke vi havas monon por tio, sed eĉ ĉe kuracisto estas vindotabloj nur en virinaj necesejoj, do estos malfacile. Mi esperas, ke tio ŝanĝiĝos, sed fakte estos pli bone, se vi estos hejme. Ni havas kontraŭdiskriminaciajn leĝojn kaj ĉiajn dokumentojn pri egaleco — ĉio ĉi estas belaj vortoj.

Estu sekura kaj skribu ion pozitivan, ĉar mi bezonas kuraĝigon.

Ame,
Jana