Civitana socio

Civitana socio kiel loko de diskuto

Civitana socio povas esti konsiderata ankaŭ kiel spaco por publika diskuto kaj por realigo de aktiva civitaneco en atingado de komunaj celoj. En tiu publika spaco estas ellaborataj kaj diskutataj publikaj aferoj, publika politiko, registaraj agadoj kaj komunumaj aferoj kaj problemoj pri kultura identeco. Tiu publika spaco povas esti fizika, ekzemple komunuma aŭ kultura centro, aŭ virtuala, ekzemple blogoj aŭ sociaj retoj.

La kultura centro Stanica okupas la malnovan konstruaĵon de la stacidomo Žilina-Záriečie en Slovakio ekde 2003. Ĝi kombinas la rolojn de sendependa scenejo, artista laboratorio kaj aktivista kolektivo. Ĝi estas kultura nodo: krea, eduka kaj kritika. Truc sphérique, neregistara organizaĵo por modernaj artoj kaj kulturo estis fondita en 1998 en Žilina. La organizaĵo malfermis Stanican en 2003, kie estas galerio, metiejo kaj vivejo por artistoj, kafejo, atendejo kaj plurfunkcia scenejo por teatro, dancoj, koncertoj, diskutoj kaj projekciadoj. Krome, estas ankaŭ granda ekstera spaco malferma al la publiko kun ĝardeno, parko, somera scenejo kaj infana ludejo. Ĉiusemajne estas pluraj diversaj metiejoj por infanoj, kaj du aŭ tri artistaj okazaĵoj. En 2009 estis ankaŭ lanĉita la ejo S2, alternativa konstruaĵo el bieraj kestoj kaj pajlostakoj. Stanica estas ne nur kultura centro de la urbo aŭ regiono, sed platformo por informado, esplorado kaj realigo de eksperimenta arto, kulturaj kaj komunumaj projektoj kaj internacia kaj intersektora komunikado, kiu kondukas al agadoj por aliaj institucioj kaj trans eŭropaj retoj, inkluzive de Trans Europe Halles.